வினை - எதிர்வினை - தொடர்வினை

கால் பிய்க்கப்பட்ட குழந்தை
அழுதுகொண்டிருக்கிறது தனியாக
கர்ப்பிணியின் வயிற்றைக் குத்தி
சிசுவின் உருவாகாத உடலைக் கிழித்தும்
தேடித் தேடிக் கொன்றும்
கொண்டாடுகிறார்
கையில் சூலமேந்தியவர்கள்

நிகழ்ந்த வரலாறின்
கரிய நிழல்
சூழ்ந்திருக்கிறது நாற்புறமும்

வெடிக்கின்றன குண்டுகள்
காய்கறிச் சந்தையிலும்
பேருந்துகளிலும்
பொது ஜனங்கள் அல்லாட

ஃப்ளூரசண்ட் திரைகளில்
வெடித்த மற்றும் வெடிக்காத
குண்டுகளைப் பார்த்துக் கொண்டிருக்கிறார்கள்
வரலாற்று நாயகர்கள்
ஏசி அறைகளில் சொகுசாக