காமக் கதைகள் 45 (31)

சொல்வதற்குச் சங்கடப்பட்டான் அதீதன். ‘இல்ல, இந்தக் கதையைச் சொல்லலாமான்னு தெரியல’ என்றான். ‘ஏன் யார்கிட்டயாவது உதை வாங்கின கதையா... இப்படி எல்லாம் இமேஜ் வச்சுக்காத’ என்றேன். ‘போடா முட்டாள்’ என்றுவிட்டு, நிதானித்து கதையை ஆரம்பித்தான்..

’அப்ப எனக்கு 19 வயசிருக்கும். மண்டை முழுக்க செக்ஸ்தான் இருக்கும். எப்படியாச்சும் பொம்பள உடம்ப பார்த்துட துடிக்கும். எவ்வளவோ கேவலமான காரியங்களைப் பண்ணியிருக்கேன்’

’நீ மட்டுமா, எல்லாரும்தான் பண்ணியிருப்பாங்க... தைரியமாச் சொல்லு’

’என்னோட தூரத்து சொந்தக்காரப் பொண்ணு. பேரு ஸ்ரீவாணி. என்னைவிட நாலு வயசு பெரியவ. வீட்டுக்கு வந்திருந்தவ நேரமாயிட்டதால ராத்திரி தங்கிட்டா. படுக்கறதுக்கு ஒரே ரூம்தான். நான், அம்மா, அவ மூணு பேரும் படுத்திருந்தோம். காலையில எழுந்து பார்த்தா, அம்மா சமையல் ரூம்ல இருந்தாங்க. வெளிச்சம் வராம இருக்க இந்த ரூம் கதவு சாத்தியிருந்துச்சு. ஸ்ரீவாணி தூங்கிகிட்டிருந்தா. அவளோட பாவாடை முட்டி வரைக்கும் வந்திருந்துச்சு.

அவளோட உடம்ப தொட்டுப் பாக்க என் மனசுல ஆசை. ஆனா அவ முழுச்சுகிட்டா என்ன செய்யறதுன்னும் பயம். மனசு கிடந்து தள்ளாடிச்சு. ஆனாலும் ஆசைய அடக்க முடியல.

நைஸா அவளோட பாவடைய கொஞ்சமா தூக்கி அவ தொடைய தொட்டேன்.

டக்குன்னு முழிச்சுகிட்டா ஸ்ரீவாணி. எனக்கு ஷாக் அடிச்சா மாதிரி வெலவெலத்துப் போயிட்டேன். கண் முன்னாடி உலகமே சுத்துது. எவ்வளவு நேரமாச்சுன்னு தெரியல... அப்படியே நின்னவன் தலைய குனிஞ்சுகிட்டு ரூம விட்டு வெளிய வந்துட்டேன்.

தெரு முனைக் கடைக்குப் போய் அடுத்தடுத்து ரெண்டு சிகரெட் வாங்கிப் பிடிச்சேன். போச்சு, வீட்ல அம்மாகிட்டயோ இல்லாட்டி அவளோட சொந்தக்காரங்ககிட்டயோ சொன்னா நான் அவ்வளவுதான், காலி. காலியாகறத விடு, எவ்வளவு பெரிய அவமானம் - மூஞ்சி மேலயே காறித் துப்புவாங்க எல்லாரும்.

டிஃபன் முடிச்சுட்டு அவ கிளம்பினா. பஸ் ஸ்டாண்டுக்கு கொண்டு விட சைக்கிள எடுத்தேன். யார்கிட்டயும் சொல்லிடாத ப்ளீஸ்னு வாய்விட்டு கேக்கவும் கூச்சமா இருந்துச்சு. அவ பின்னாடி கேரியர்ல உக்காந்துகிட்டு, இந்த மாதிரி விஷயம் நடந்தா மாதிரியே காட்டிக்கல. வேற எதையோதான் பேசிகிட்டு வந்தா.

நாளாக நாளாக தெரிஞ்சது - அவ யார்கிட்டயும் இந்த விஷயத்தைச் சொல்லவேயில்ல. அப்ப எனக்கு எவ்வளவு ஆசுவாசமா இருந்துச்சு தெரியுமா?

இப்ப அவளுக்குக் கல்யாணமாகி ரெண்டு குழந்தைங்க இருக்கு. அதுக்கப்புறம் அவளை நிறைய தடவை சந்திச்சிருக்கேன் - ஒரு தடவைகூட ஏண்டா அப்படிப் பண்ணினேன்னு அவ கேட்டதேயில்ல.

இப்ப அவள நினைச்சா கூட ரொம்ப நெகிழ்வா இருக்குடா’

என்றபடி கதையை முடித்தான் அதீதன். யோசித்தபடி இருந்த எனக்கு ஏனோ கதை அங்கே முடிந்த மாதிரி தோன்றவில்லை. நான் ‘அவ உன்மேல பரிதாபம் பார்த்து விட்டாளோ இல்லாட்டி அவளுக்கே நீ தொட்டது பிடிச்சிருதுச்சோ’ என்றேன். திடுக் திருப்பமென்றால் கதை இங்கேயாவது முடிய வேண்டும். ஆனால், அதீதன் பிரியப்பட்டபடி அவன் சொன்ன இன்னொரு வாக்கியத்துடன் முடிகிறது.

’சே, உன் புத்தி ஏண்டா இவ்வளவு வக்கிரமாகிடுச்சு?’

காமக் கதைகள் 45 (30)

ஹலோ மை டியர் ராங் நம்பர்

அலைபேசி மணி அடித்தது. தெரியாத எண். தெரிந்தது தெரியாதது என்றெல்லாம் பார்ப்பதில்லை அதீதன். எடுத்தான். ‘ஹலோ'. உடனே
எதிர்புறமிருந்து : ‘ஹலோ, செல்லதுரையா...' ஆஹா, பெண்குரல்!

அதீதன் : இல்லீங்க, நான் அதீதன் பேசறேன்
பெண் : அதென்னங்க பேர், அதீதன்னு
அதீதன் : இல்லீங்க, அதுதான் என் பேரு
பெண் : அதுதாங்க, அது என்ன அதீதன்னு

இப்போது அதீதனுக்குச் சந்தேகம் வந்தது. யாராவது தெரிந்தவர்கள் விளையாடுகிறார்களோ என்று...

அதீதன் : நானே வச்சுகிட்ட பேர்தாங்க இது
பெண் : அதுதான், ஏன் வச்சுக்கிட்டீங்க?

(கீகீகீ என நடு நடுவில் அவள் சிரித்துக் கொண்டிருப்பதும் இவன் சத்தமெழுப்பாமல் இளித்துக் கொண்டிருப்பதும் கதைக்குத் தேவையில்லாததால் தவிர்க்கப்படுகிறது)

அதீதன் : அதுவாங்க.. எனக்கு எல்லாமே அதிகமா இருக்கும்ங்க
(சொல்லும்போது அவன் தன் பேண்ட் ஸிப்போடு சேர்த்து தன் குறியைத் தடவிக் கொள்கிறான்)
பெண் : எதுலங்க
அதீதன் : எல்லாத்துலயுங்க
பெண் : அத நாங்க இல்ல சொல்லணும்
அதீதன் : சொல்ல வாய் எழும்பாதுங்க உங்களுக்கு
பெண் : ஹலோ மிஸ்டர்...

லைன் துண்டிக்கப் படுகிறது. மறுபடி இவன் அழைக்கிறான் :

பெண் : சொல்லுங்க, இப்பத்தானே பேசுனோம்
அதீதன் : ஏன், வேலையா இருக்கீங்களா
பெண் : வேலையெல்லாம் ராத்திரிலதாங்க
அதீதன் : ஏன், பகல்ல செஞ்சா சரியா வராதா
(மறுபடியும் கீகீகீ, மறுபடியும் இளிப்பு இரண்டும் தவிர்க்கப்படுகிறது)

சில நாட்கள் கழித்து இவன் கூப்பிட்டான் :

அதீதன் : இப்ப என்ன டிரெஸ் போட்டிருக்க
பெண் : ஏன், கேக்கறீங்க
அதீதன் : பேசறப்ப அப்படியே நீ எப்படியிருப்பன்னு கற்பனை செஞ்சுக்கத்தான்
பெண் : ப்ளூ சுடி... நீங்க
அதீதன் : வெறும் லுங்கிதான்
பெண் : வெறும் லுங்கின்னா
அதீதன் : உலகத்துலயே ஃபிரீயான விஷயம் ஜட்டி போடாம லுங்கி போடறதுதான்
பெண் : வெறும் லுங்கியோட இருந்தா தொந்தரவா இருக்காது
அதீதன் : நேர்லதான் சொல்லணும்
(கீகீகீ, இளிப்பு தவிர்க்கப்படுகிறது)

மறுபடியும் சில நாட்கள். தினமும் அவள் பேசா அழைப்புகளாக விட, இவன் தான் கூப்பிடுவது.

அதீதன் :
பெண் :.

அடுத்து இன்னொருமுறை இவன் கூப்பிட :

பெண் :
அதீதன் :

பெண் : ஆஃபீஸ்ல வேலையில்லயாக்கும்
அதீதன் : வேலைக்காகத்தானே உன்கிட்ட பேசிகிட்டிருக்கேன்

கதை இப்படியே போய்க் கொண்டிருக்க, இதற்குமேல் விரிவாக எழுத விருப்பமில்லாததால், நடுவில் நான் நுழைய வேண்டியதாயிருக்கிறது. பொருத்தருள்க.

இதை வாசித்துக் கொண்டிருக்கும் நீங்கள் ஆணாயிருக்கும் பட்சத்தில், கதையில் பெண் என்று வரும் இடத்தில் நீங்கள் மோகிக்கும் பெண்ணின் பெயரைப் போட்டுக் கொள்ளவும்; அதீதன் என்ற இடத்தில் உங்கள் பெயரையும்.

பெண் மற்றும் ஆண் பேசும் இடங்களில் இரண்டை வெற்றிடமாக விட்டிருக்கிறேன்; அதை நீங்கள் நிரப்ப வேண்டாம் - அதீதன் கதையை நான் எழுதுவது போல உங்கள் கதையை வேறொரு நண்பர் எழுதுவார்.

நீங்கள் பெண்ணாயிருக்கும் பட்சத்தில் .....

காமக் கதைகள் 45 (28)

வாழ்க்கையில் எந்தக் காதலியுமில்லாமல் வறண்டிருந்தபோது அதீதன் தன் நண்பன் குமாரிடமிருந்து வினிதாவின் அலைபேசி எண்ணை வாங்கியிருந்தான்.

'என் ஆள்தான், பரவாயில்லை, நீ வச்சுக்கோ' எனப் பெருந்தன்மையாகச் சொல்லிவிட்டான் குமார்.

வினிதாவிடம் நாளொன்றிற்கு 4 மணிநேரம் மொக்கை போட ஆரம்பித்தான் அதீதன். அவள் மிஸ்ட் கால்தான் கொடுப்பாள், இவன்தான் அழைக்க வேண்டும்.

மெதுவாக டிரைவர் அந்தஸ்திற்கு உயர்ந்தான். அவளைக் கல்லூரியில் சென்று விடுவது, அழைத்துக் கொண்டு வருவது என. அப்புறம், காஃபி ஷாப், சினிமா, மகாபலிபுரம் ரிசார்ட் என வளர்ந்தது.

அவளுக்குத் திரைத்துறை விஷயங்கள் நிறைய தெரிந்திருந்தன. அந்தப் பழைய பிரபல மா வரிசை நாயகிகளை அறிமுகப்படுத்திய இயக்குனர் கதாநாயகிகளைத் தேர்ந்தெடுக்கும் விதத்தைச் சொன்னாள். ஒரு ரூபாய் நாணயத்தை முலைக்கடியில் வைப்பாராம். நாணயம் விழுந்து விட்டால், அந்த நடிகை தேர்ந்தெடுக்கப்படுவாள். முலை அழுத்திப் பிடித்துக் கொண்டு நாணயம் கீழே விழாவிட்டால் ரிஜக்டட்! வாய் பிளந்து கேட்டுக் கொண்டிருப்பான் அதீதன். தன் மொபைலில் சேமித்து வைக்கப்பட்டிருந்த அந்த இளம் நாயகன் + பிரபல நாயகியின் வீடியோவைக் காண்பிப்பாள், அல்லது இன்னொரு (இப்போழுது திருமணமாகிவிட்ட) நாயகியும் அவளது காதலனும் இணைந்திருக்கையில் எடுத்த வீடியோவை.

அதீதனின் செல்ஃபோனில் ப்ளூடூத் இல்லாததால் இதையெல்லாம் சேமித்து வைத்துக் கொள்ள முடியவில்லை. இதில் அவனுக்கு வருத்தமே.

சில மாதங்கள் கழித்து திடீரென்று ஒரு நாள் ‘எனக்கு செமஸ்டர் எக்ஸாம் ஆரம்பமாகப் போகுது. நிறையப் படிக்கணும், அதனால நாம இனிப் பழக வேண்டாம்' என்றாள். அதீதனுக்கோ வியப்பு.

குமாரிடம் சொன்னான். ‘அவளுக்கும் போரடிக்காதா... அதான் மேட்டர் முடிச்சிட்ட இல்ல, அப்புறம் என்ன லூஸ்ல விடு' என்றுவிட்டு பாஸ்கருக்கு ஃபோன் போட்டு வினிதாவின் எண்ணைக் கொடுத்தான்.

‘பாஸ்கர் பாவம், நாலஞ்சு தடவை கேட்டுட்டான்...' என்றான்.

எக்ஸாம் போன இடம் தெரியவில்லை. இப்போது பாஸ்கரனுடன் சுற்றிக் கொண்டிருக்கிறாள்.

அதீதனும் வேறு ஒருத்தியைத் தேடத் துவங்கிவிட்டான்.

காமக் கதைகள் 45 (27)

அரட்டைப் பெட்டியின் மூலம் அறிமுகமானவள் ப்ரீத்தி. மெயிலிலும் அரட்டையுமாக அவர்களது நட்பு வளர்ந்தது. அதீதன்மேல் பெருமக்கறை கொண்டிருந்தாள் அவள். அவசரத்திற்கு அறைவாடகை கட்டுவதிலிருந்து ஆடை வாங்கித் தருவது வரை பல செய்திருக்கிறாள். நடுவில் அவன் கேட்கும் புத்தகங்கள் வேறு.

நேர்ச் சந்திப்பில்லாமலேயே இத்தனையும் செய்துகொண்டிருந்தாள். அவனுக்குச் சந்தேகமாகவேயிருந்தது, இது வெறும் அக்கறை சார்ந்த ஒன்றா அல்லது காதலா என்று. அந்தச் சந்தேகம் அவளுக்கும் இருந்திருக்க வேண்டும். குழப்பத்திலேயே கழிந்தன நாட்கள்.

அரட்டைப் பெட்டியில் அதீதனின் ஸ்டேட்டஸ் மெசேஜ்கள் மூலமாகவே அவர்கள் காதலைத் தொடர்ந்து கொண்டிருந்தேன் நான்.

குழப்பமாகக் காதலிப்பதைவிட தெளிவாகப் பிரிந்து போகலாம்.

பல மாதங்கள் கழித்தே இருவரும் நேரில் சந்தித்தனர். அதற்குமுன்பே புகைப்படங்களைப் பரிமாற்றிக் கொண்டிருந்தாலும், நேரில் பார்க்கும் கிளுகிளுப்பு இருந்தது. இருவரும் தங்கள் காதலைச் சொன்ன சில நாட்களில் அவளுக்குத் திருமணம் நிச்சயிக்கப்பட்டது லண்டனிலிருந்த அவள் சாதிப் பையனொருவனுடன்.

எவரிடமும் எதைச் சொல்லியும் விடைபெற்றிடலாம். அவளிடம் எதைச் சொல்லாமலும்.

அன்றிரவு மூக்குமுட்டக் குடித்துவிட்டுச் சலம்பிக் கொண்டிருந்தான் அதீதன். அதை படிக்க நீங்கள் வேறு கதைக்குச் செல்ல வேண்டும்.

எல்லாரிடமும் எதையாவது சொல்லி விடைபெறலாம். உன்னிடம் எதுவும் சொல்லாமலும்.

திருமணமாகி லண்டன் சென்ற பிறகும் அவனுடன் மின்னஞ்சல் தொடர்பிலிருந்தாள் ப்ரீத்தி. அவனைத் தொடர்ந்து காதலிப்பதாய்ச் சொன்னாள். அங்கிருந்து தொலைபேசி அரைமணிநேரம் பேசிக் கொண்டிருப்பாள். அவன் அவளைத் திரும்ப வர அழைத்தான். அது முடியாதென மறுத்தாள். அவனால் அவளது உறவைத் துண்டிக்கவும் முடியவில்லை, தொடரவும் முடியவில்லை.

சொசைட்டின்னு பார்த்து இனிமே எந்த முடிவும் எடுக்க மாட்டேன், இனிமே எனக்காக மட்டும்தான் யோசிப்பேன்.

விடுமுறைக்கு ப்ரீத்தி இந்தியா வந்திருந்தபோது மீண்டும் சந்தித்தார்கள். முதல் முறையாக உடலுறவு கொண்டார்கள்.

பிறகு அவள் மறுபடியும் லண்டன் சென்றுவிட்டாள்.

புதிதாக வந்தனா அதீதனின் வாழ்வில் வந்தாள். அவளுடன் பழக்கமேற்பட்ட பிறகு, அதீதன் ப்ரீத்தியைத் தவிர்க்க ஆரம்பித்தான். ஆனாலும், யாரையோ ஏமாற்ற இந்தச் செய்தியை வைத்திருந்தான் :

என் விஷம் உண்ணும் பெண் நீலகண்டம் நீ.

காமக் கதைகள் 45 (26)

இந்தப் பெண்கள் எவ்வளவு சாமர்த்தியசாலிகளாக இருக்கிறார்கள்!' என்று புலம்ப ஆரம்பித்தான் அதீதன். அதுவும் உன்னை மாதிரி ஆளுங்களை நம்பவே கூடாதென்றான். எனக்கு திடுக்கென்றது என்னைப் பெண்ணாகப் பார்க்கிறானே என்று. இல்லையாம், அவன் சொல்ல வந்தது என்னைப் போன்ற ஊமைப் போல இருக்கும் பெண்களை. சரி, போய்த் தொலையட்டும் என விட்டுவிட்டேன். ஒருமுறை குடிபோதையில் என்னை ஒம்போது என்றுகூடத் திட்டியிருக்கிறான்.

மகேஷ் பிரபல நிறுவனமொன்றில் பெரிய பதவியில் இருப்பவன். அரட்டைப் பெட்டியில் ஒருநாள் மாதங்கி வந்து மகேஷின் மின்னஞ்சல் முகவரி கேட்டிருக்கிறாள். இவனும் எதார்த்தமாகக் கொடுத்திருக்கிறான். அன்று வேலை விஷயமாக வெளியூர் செல்ல வேண்டியிருந்ததால் மகேஷிடம் அடுத்த வாரம்தான் பேசமுடிந்திருக்கிறது. பேச்சு வாக்கில் மாதங்கியிடமிருந்து மெயில் வந்ததா எனக் கேட்டிருக்கிறான். மகேஷ் சொன்ன பதில் அவனைத் தூக்கி வாரிப் போட்டது. 'ம்ம், நேர்லகூட ரெண்டு வாட்டி மீட் பண்ணிட்டோமே...' அடிப்பாவி. தான் பழகிய இந்த ஆறுமாத காலத்தில் ஒரே முறைதான் சந்தித்திருக்கிறாள், ஆனால் மகேஷுடன் அதற்குள் இரண்டு முறையா... ம்ம், நடக்கட்டும்.. இந்தப் பயல் மகேஷ் அவள் பின்னாடியே சென்றிருப்பான், அதனால்தான் இருக்கும் என நினைத்துக் கொண்டான். அடுத்த குண்டைப் போட்டான் மகேஷ். ‘நேத்து ஃபோன் பண்ணி உங்க வீட்டுப் பக்கம்தான் இருக்கேன், வரட்டுமா என்றாள்.. சரி என்று வரச் சொல்லிப் பேசிக் கொண்டிருந்தேன்' என்றான்.

நல்லா வேணும் அதீதனுக்கு.

திருமணம் ஆகிப் பல வருடங்கள் ஆனதால் போரடித்தது எனக்கு. நைஸாக ஏதாவது சின்ன வீடு செட்டப் செய்யலாமா என்றுகூடத் தோன்றியது. ஒருமுறை அதீதனிடம் அவனது பெண் நண்பர்கள் யாரையாவது எனக்கு அறிமுகப்படுத்தி வைக்கச் சொன்னேன். ‘உனக்காவது பெண்டாட்டி இருக்கா.. நானே கையில பிடிச்சுகிட்டு அலையறது எனக்குத்தான் தெரியும்' என்றுவிட்டான்.

நானே பிறகு ஒரு பெண்ணை கஷ்டப்பட்டு தேற்றினேன் என்று வைத்துக் கொள்ளுங்கள். ஆனால் என் ராசி, அவளும் கொஞ்ச நாட்களிலேயே போரடித்துவிட்டாள்.

இதற்கு நடுவில் நானும் அவளும் ஒரு கதையில் ஹோட்டலில் ரூம் போட்டது என் மனைவிக்குத் தெரிந்து ஒரே ரகளை. எல்லாமே கதைதான் என்பதை நிரூபிக்க அவள் எனக்கு எழுதியிருந்த கற்பனைக் கடிதத்தை என் மனைவியின் கனவில் வாசித்துக் காட்டினேன். நானும் அதீதனும் நெருங்கிப் பழகுவதைப் பார்த்து சிலர் என்னை கே எனக்கூடச் சொல்வார்கள், நம்பாதே எனச் சொல்லியிருக்கிறேன் அவளிடம். 45வது கதையில் வரும் என் காதலியை முடிந்தால் அடித்து விரட்டிவிட்டு ஒப்புக் கொள்வதாகச் சொல்லியிருக்கிறாள்.

'இன்னும் ஒரு வாரம் அவங்க பழகினா நிச்சயம் மகேஷ் மேட்டர முடிச்சுடுவாண்டா' என்றான் அதீதன். உன் பிரச்சனை என்ன, நீ செய்யாததா அல்லது வேறொருவன் செய்வதா என்றேன். ‘பெரிய புடுங்கி மாதிரி பேசாதே..' எனச் சொல்லி ஃபோனை வைத்துவிட்டான்.

மாதங்கியைப் பற்றி என்னிடம் பேசியிருக்கிறான். ‘என்னா ஸ்ட்ரக்சர்.. எப்படியாவது அவளை முடிச்சுடணும்' என்பான். ஆனால் நான் அப்படியெல்லாம் பேசுவதில்லை. எழுத்தாளனுக்கென்று ஒரு சமூகப் பிரக்ஞை இருக்கிறதல்லவா. பொலிட்டிக்கலி கரெக்டாக வேறு இருந்து தொலைக்க வேண்டியிருக்கிறது.

'இந்த எழுத்தாள புண்டா மவனுங்கள நிக்க வச்சு ஒதைக்கணும்' என்றான் ஒருநாள். அவனது கதைகளில் வந்த மதுமிதாவை அவனுக்குத் தெரியாமல் ஆட்டையைப் போட்டுவிட்டேன், அந்தக் கோபம்தான். ஆனாலும் பாருங்கள்.. ஒரே முறைதான் அவளுடன் உடலுறவு கொண்டேன். சாதாரணமாக ஒழுங்காக வேலை செய்யும் என் சாமான் அன்று பார்த்து மக்கர் செய்துவிட்டது. அதற்குப் பிறகு அவள் என்னைச் சந்திக்கவேயில்லை (இதையே திலீப்குமாரின் ஒரு சிறுகதையைப் போல விலாவரியாக எழுதினால் இலக்கியம் என்பார்கள், இப்படி எழுதினால் ஆபாசமென்பார்கள்.. ம்ஹூம், என்ன செய்ய..).

சரி, இந்தக் கதையை இலக்கியமாக்கி விடுவோம்.. வட்டச் சுழலில் பாதியில் நிற்பதுபோல் இருக்கிறது என்றான் கேலிங்கன்.

கணினியும் போர்னோவும் கொலைகளும்

அறைக்குள் திடீரென
யாரும் பிரவேசித்தால்
வலப்பக்க மேல்மூலையிலுள்ள
சின்ன xஐ அழுத்த வேண்டும்
யாரும் வரும் சமயமல்ல என்றாலும்
எலியை அதை நோக்கியே
வைத்திருக்க வேண்டும்
பாகுபாடில்லாமல் அனைவரும்
சோரம்போகும் தளத்தில்
உலாவுகையில்
ஒலியை இல்லாமலாக்க வேண்டும்

சிலிக்கன் பொருத்தப்பட்ட
நிமிர்ந்த மார்பில்
இல்லாத தாலியைத் தொட்டபடி
தொங்கிக் கொண்டிருக்கும்
விறைப்பேறாத குஞ்சா மணிகளையும்
நம்பிக்கைகளையும்
தூரப்போட வேண்டும்

இப்போது வரலாற்றை
அழிக்கும் படலம்
ஆரம்பமாகிறது

காமக் கதைகள் 45 (25)

ஒருவனுக்கு ஒருத்தி

பலரைப்போல் எனக்கும் அதீதன்மேல் பொறாமையாக இருந்தது, இவ்வளவு பெண்களைக் கவிழ்க்கிறானே என்று. உன்னுடைய வழுக்கைத் தலைதான் பிரச்சனை, வீவிங் செய்துகொள் என்றான். அதிலெல்லாம் எனக்கு விருப்பமில்லை எனப் போலியாக பதில் சொன்னேன்.

உன் நண்பன் மனோகரைப் பார். 40 வயதில் ஒரே நேரத்தில் ஐந்து காதலிகளை வைத்திருக்கிறான் என்றான். மனோகர் கதை எங்களுக்குத் தெரியாதா என்ன.. சரியான வெண்ணை அவன். பெண்களுடன் காரில் சுற்றுவான்; அவர்களுக்கு வேண்டியதை வாங்கிக் கொடுப்பான்; கடற்கரையில் அமர்ந்து கைகளைப் பிடித்துக் கொண்டிருப்பான்; அதற்குமேல்... அவ்வளவுதான். லூசாடா நீ என்றுகூட நண்பர்கள் திட்டுவார்கள். ஆள் பார்ப்பதற்கு ஸ்மார்டாக இருந்தாலும் காரியத்தில்... வேஸ்ட் மனோகரன் என எங்கள் வட்டாரத்தில் அவனுக்குப் பட்டப்பெயர்கூட வைத்திருக்கிறோம்.

மனோகர் ஒரு சௌந்தர்ய உபாசகன் என்றேன். 'மசிரு' என்றவன், மனோகர் காரில் போகும்போது தன் ஆங்கிலோ இந்தியக் காதலியிடம் செய்த மேல் விளையாட்டுகளை விவரித்தான்.

என்ன எழவோ? இம்மாதிரியான கருமங்களையெல்லாம் எழுதித் தொலைய வேண்டியிருக்கிறது. ஆனால் நான் அடிப்படையில் ஒருவனுக்கு ஒருத்தி என்பதில் திட நம்பிக்கையுடையவன். என் மனைவியைத் தவிர வேறு யாரையும் ஏறெடுத்தும் பார்க்காதவன். அல்லது குறைந்தபட்சம் அப்படி காட்டிக்கொள்ள விரும்புபவன். சமூக ஒழுங்கிற்கு அது தேவைதானே.

ஒருவனுக்கு ஒருத்தி; ஒரு சமயத்தில் ஒருவனுக்கு ஒருத்தி; ஒரே சமயத்தில் ஒருவனுக்கு ஒருத்தி; ஒருத்திக்கு ஒருவன்; ஒரே சமயத்தில் ஒருத்திக்கு ஒருவன்; ஒரு சமயத்தில் ஒருத்திக்கு ஒருவன்; ஒரே சமயத்தில் ஒருத்திக்கு ஒருவன்; ஒரே சமயத்தில் ஒருவனுக்கு ஒருத்தி; ஒரே சமயத்திலேயே ஒருவனுக்கே ஒருத்தி; ஒரு சமயத்திலேயே ஒருத்திக்கு ஒருவன்; ஒரே சமயத்திலேயே ஒருவனுக்கு ஒருத்தி, ஒரு சமயத்தில் ஒருவனுக்கே ஒருத்தி, ஒரு சமயத்தில் ஒருத்திக்கே ஒருவன், ஒரே சமயத்தில் ஒருவனுக்கே ஒருத்தி, ஒரே சமயத்தில் ஒருத்திக்கே ஒருவன், ஒரு சமயத்தில் ஒருவனுக்கு ஒருத்தியே, ஒரே சமயத்தில் ஒருவனுக்கு ஒருத்தியே, ஒரு சமயத்தில் ஒருத்திக்கு ஒருவனே, ஒரே சமயத்தில் ஒருத்திக்கு ஒருவனே...

மொழியிலேயே இவ்வளவு சாத்தியக்கூறுகள் இருக்கும்போது காமத்திற்கும் காதலுக்கும் ஒற்றைத் தன்மையை எதிர்பார்க்கிறாய் என்றான்.

(அதீதனின் செக்ஸ் ஓரியண்டேஷன் ஸ்டிரெய்ட்தான். ஆனால் வேறு சில விளையாட்டுகளையும் முயற்சி செய்திருக்கிறான். ஜெல்லைக் கையில் வைத்துக் கொண்டு அவன் செய்த குதப் புணர்ச்சி முயற்சியை அடுத்த கதையில் எழுதுகிறேன் - எல்லாம் என் தலையெழுத்து!.)

புணர்ச்சி சலித்து ஒதுங்கியவன்

பலநாட்கள் கழித்து சந்தித்தேன்
பழைய காதலியை
இடுப்பசைத்து நடனமாடி அவள்
சூடேற்றினாள்
கன்னக் கதுப்பை தொட்டுத் தடவி

குதூகலமாகவே கழிந்த இரவில்
சரியாகச் செய்தோமோ என
மனம் அல்லாடிக் கொண்டிருக்க
புரண்டு படுத்து
உறங்கத் துவங்கியவள்

கைகொட்டிச் சிரிக்கிறாள்
கனவில்

காமக் கதைகள் 45 (24)

வெற்றிக்குப் பார்த்திருந்த பெண்ணுடன் அதீதனுக்கு தொடர்பிருந்தது, அந்தப் பெண் பெயர் முக்கியமில்லை, அவள் வேறொருவனைக் காதலிப்பது தெரிந்தும் வெற்றி திருமணத்திற்கு ஒப்புக் கொண்டான், அதில் அவளுக்கு வெற்றிமேல் தீராத கோபம், அதீதன் தான் அந்தக் காதலன் என்பது வெற்றிக்குத் தெரியாது,

அலுவலகத்தில் உடன்வேலை செய்தவனுக்கு பயிற்சிக்கென மலேஷியா செல்ல வேண்டியிருந்தது. அதீதனும் ஒட்டிக் கொண்டான். அங்கு சீன மற்றும் தாய்லாந்து அழகிகளைப் பார்த்துப் பெருமூச்சு விட்டுக்கொண்டிருந்தான். ஹோட்டல் 27வது மாடி நீச்சல் குளத்தைச் சுற்றி பொன்நிற மங்கைகள் தொடை தெரியும் மிடியுடன் அசைந்தசைந்து நடந்து கொண்டிருந்தனர். அதீதனுக்கு மேலே விழுந்து புரள வேண்டும் போலிருந்தது.

திருமணமானபின்னும் அதீதனால் அவர்கள் வீட்டிற்குச் சென்றுவருவதை நிறுத்தவில்லை, மனதும் உறுத்திக் கொண்டேயிருந்தது, வெற்றி ஊரிலில்லாத போதெல்லாம் தகவல் அனுப்புவாள், வீட்டிற்குச் சென்றதும் அவள் முத்தமிடும்போது அவனுக்கு வெற்றியின் முகம் நினைவில் ஆடியது,

மலேஷிய ஹோட்டல் ஸ்பெஷல் மசாஜில் இரண்டு வகையுண்டு:

(1) நீங்கள் குப்புற இரண்டு கால்களையும் இணைத்தபடி படுத்திருக்க மசாஜ் செய்யும் பெண் உங்கள் கழுத்திலிருந்து கால்கள் வரை பிடித்துவிடுவது. இதில் முக்கியமானது அந்தப் பெண் நிர்வாணமாயிருப்பாள் என்பதும் தன்னுடைய பின்புறத்தால் மசாஜைச் செய்வாள் என்பதும். உங்கள் பிருஷ்ட பாகத்தில் அவளுடைய பிருஷ்ட பாகம் தொட்டு, பிறகு பிரிவது தனிசுகம்! பூப்பந்து கொண்டு அழுத்தித் தடவுவது போல இருக்கும் என்பது அதீதனின் வார்த்தைகள்.

(2) உங்கள் முதுகில் தலையணையை வைத்து அதன்மேல் அவள் சாய்ந்து உங்களை இறுக்கி அணைத்து மசாஜ் செய்வது. நெட்டி முறியும் சத்தங்கள் கேட்கவே போதையாயிருக்கும். தலையணை இல்லாமல் செய்யக்கூடாதா என ஏங்கவைக்குமிது.

நண்பனை நச்சரிக்கத் துவங்கினான் ஸ்பெஷல் மசாஜிற்கு.

வெற்றியைப் பழிவாங்கவே அதீதனுடன் அவள் உறவுவைத்திருப்பதாய்ச் சமாதானம் செய்வாள், உனக்கு அதில் உடன்பாடில்லை என்றால் வேண்டாம், நான் வேணுமா வேணாமா, கையில்லா நைட்டியைப் பார்த்தபடி மென்று முழுங்குவான்,

இரண்டு மசாஜையும் செய்துகொள்ளும்போது அவனது மனம் அவளுடனான சம்போகத்திலேயே கழிந்தது. சின்னச் சின்ன அங்கங்களுடன் தாய்லாந்துக்காரி பொம்மை போல் இருந்தாள். அவளிடம் எப்படியாவது கேட்டுவிடவேண்டுமென நினைத்துக் கொண்டேயிருந்தான்.

இலவச சுகத்தை விடவும் முடியவில்லை, நண்பனுக்குத் துரோகம் செய்வதாய்த் திட்டும் மனதையும் ஒன்றும் செய்யமுடியவில்லை,

மசாஜ் முடித்துவிட்டு தயங்கியபடி தாய்லாந்துக்காரி போய்விட்டாள்.

தொடர்ந்து கொண்டிருக்கிறது அவர்களது உறவு,

காமக் கதைகள் 45 (23)

அதீதனின் காதலி ரோகிணி மாற்றலாகி பெங்களூர் சென்றுவிட்டாள்.

வாரத்தில் நான்கு நாட்கள் சந்தித்துக் கொண்டிருந்தது மாதமொருமுறையாகிவிட்டது. சந்திக்கும்போதெல்லாம் அவனையும் பெங்களூருக்கு வரச் சொல்வாள். ம்ஹூம், அது வேலைக்கு ஆகாது. ‘குளிர்ல போர்வையே வேண்டாம்டா...' எனக்கூடச் சொல்லிப் பார்த்தாள். அதீதன் மசிவதாயில்லை (தமிழ்நாட்டை விட்டுப் போகக்கூடாதென்ற கொள்கைப் பிடிப்பெல்லாம் ஒன்றுமில்லை, அவனுக்கு சைனஸ் தொல்லை, அவ்வளவுதான்!).

எஸ்டிடி கட்டணம் விஷம்போலிருந்த காலமது. வேறுவழி.. அஞ்சல்துறையே கதி!

தினமொரு கடிதமெழுதுவான் அவளுக்கு. முதலில் இலக்கியமாக ஆரம்பிக்கும் கடிதம். நடுவில் அவன் வாசித்த புத்தகங்கள், நடந்த சம்பவங்கள், அவன் நடக்கக்கூடாதா என ஏங்கிய விஷயங்கள் எனக் கலந்துகட்டி இருக்கும். ஆனால் முடிக்கும்போது விரகதாபத்தை வெளிப்படுத்துவதாகவே முடியும். இதை அவன் வேண்டுமென்று செய்யவில்லையென்றாலும் அப்படித்தான் ஆகிக்கொண்டிருந்தது.

ரோகிணி வேறு நினைப்பே இல்லையா உனக்கு எனக்கோபப்படுவாள். 'உன் லெட்டர யாராவது பார்த்துடப்போறாங்களேன்னு பயமாவே இருக்கு...' கையில் பிடித்துக்கொண்டு தூங்குவது அவளுக்கெங்கே தெரியப் போகிறது!

i would like to kiss you... especially 'there' என முடித்திருந்தான் ஒரு கடிதத்தை.

அவனிடமிருக்கும் ஒரு நல்ல குணம் அந்தக் கடிதங்களை அவள் வீட்டிற்கு அனுப்ப மாட்டான். அலுவலக முகவரிக்கே அஞ்சல் செய்வான்.

ஒருமுறை அவனுடைய கடிதமொன்றைக் காட்டினான் எனக்கு :

'மின்விசிறிச் சத்தம் தெளிவாய்க் கேட்கும் அமைதி. இருளில் இருக்கிறது இரவின் அழகு. அறைக்குள்ளோ டியூப்லைட்டின் வெள்ளை வெளிச்சம் தழுவியிருக்கிறது. தூரத்து நாய்க்குறைப்பொலிகூட சங்கீதமாய்க் கேட்கிறது இப்போது உனக்கான இக்கடிதத்தை ஆரம்பிக்கையில்...

என்ன காரணத்தினாலோ இன்று மதியத்திலிருந்து உன் நினைவுகளே என்னைச் சூழ்ந்துள்ளன.

பார்வதி உன்னை விசாரித்ததாய் எழுதச் சொன்னாள். பெரிய நித்யாவும் ரியாஸும் உன்னுடனான என் தொடர்பு பற்றி விசாரித்தார்கள். பகலுக்கும் இரவுக்குமான இடைவெளிதான் உனக்குத் தெரியுமே. நம் காதலை - உன் விருப்பப்படி - நட்பென்றே சொல்லிவருகிறேன். எனக்கு நெருக்கமான அவர்களிடமும்.

ஒவ்வொரு மிடக்காக மது அருந்தியபடி வளர்கிறது இக்கடிதம்..'

என ஆரம்பித்திருந்தவன் கடைசி பத்திகளில் அவளை எப்படியெல்லாம் சம்போகிக்க வேண்டுமென்பதை விலாவரியாக விவரித்துவிட்டு, ‘எனக்கு இப்பொழுதே உன்னைக்கூட வேண்டும் போலிருக்கிறது. ஆனால், என்ன செய்ய, என்னுடையது அவ்வளவு நீளமில்லையே... ' என முடித்திருந்தான்.

அவள் ஒற்றைவரியில் பதில் எழுதியிருந்தாள்.

'நாம் மாதமொருமுறைகூட இனி சந்திக்கத் தேவையிருக்காதென நினைக்கிறேன். நீதான் முழு சம்போகத்தையும் கடிதத்திலேயே முடித்துவிடுகிறாயே...'

காமக் கதைகள் 45 (22)

அதீதனின் பழைய காதலி ஆனந்தி தற்கொலை செய்துகொண்டாள்.

முற்றும்.

பி.கு :

அதீதன் தீவிரமாய்க் காதலித்துக் கொண்டிருந்தான் ஆனந்தியை. வாரத்திற்கு மூன்று நாட்கள் சந்திப்பார்கள். கடற்கரையிலிருந்து பேருந்து பிடித்து திருவான்மையூரிலிருக்கும் அவள் அலுவலகத்திற்குச் செல்வான். இருவரும் பேசிக்கொண்டே பேருந்தில் வள்ளுவர் கோட்டம் வருவார்கள். அங்கிருந்து ஆட்டோ பிடித்து வடபழனியில் அவளை விட்டுவிட்டு தான்மட்டும் வீட்டிற்கு மறுபடியும் பேருந்து பிடித்துச் செல்வான். கடற்கரை - திருவான்மையூர் - வள்ளுவர் கோட்டம் - வடபழனி - அவன்வீடு - மொத்தம் ஐம்பது கிலோமீட்டர் இருக்கும். பேருந்துகளையே வெறுக்கும் அதீதன் அதில் 45 கிலோமீட்டர் பேருந்திலேயே பயணம் செய்வான்.

வீட்டை அடைந்ததும், கடிதமெழுத ஆரம்பித்துவிடுவான். முழுநீளத் தாளில் நான்கு பக்கங்கள், சில சமயம் ஐந்து பக்கங்கள்கூடப் போகும் கடிதம்.

அடுத்த நாள் அந்தக் கடிதத்தைத் தபாலில் சேர்ப்பான். அடுத்த முறை அவளைப் பார்க்கும்போது அந்தக் கடிதத்தைப் பற்றி விசாரிப்பான். சில சமயம் அடுத்தநாளே பார்க்கும்படி இருந்தால் அவள் கையிலேயே அந்தக் கடிதத்தைக் கொடுத்துவிடுவான். அவளும் அவனுடன் பேருந்தில் வரும்போது அக்கடிதத்தைப் படித்தபடி வருவாள்...

அதீதன் வண்ணதாசன்மேல் பித்தாயிருந்த காலமது. அவரது எழுத்துகள்போலவே அவனது கடிதங்கள் இருக்கும். 'அச்சோ இவ்வளவு எழுதறீங்களே, விரல் வலிக்காதா' என அவள் கொஞ்சலாய்க் கேட்பது கவிதையாயிருக்கும்.

அந்தக் கடிதங்களில் என்ன எழுதினான், அவளுடன் என்னவெல்லாம் பேசினான் என்பது அவனுக்கு நினைவிலேயே இல்லை.

முடிந்தது.

மேலும் சில குறிப்புகள் :

(1) வந்தனாமூலம் அறிமுகமானவள் ஆனந்தி - அப்போது அவள் சந்தோஷுடன் இருந்தாள். அதீதன் ஆனந்தியைக் காதலித்தது வந்தனாவிற்குத் தெரியாது. போலவே ஆனந்திக்கும் அதீதனின் வந்தனாவுடனான பழைய உறவு பற்றித் தெரியாது.

(2) அதீதனுக்கும் ஆனந்திக்கும் உடல்-ரீதியான தொடர்பிருந்ததில்லை. அதற்கான முயற்சியில்கூட அவன் இறங்க விரும்பியதில்லை.

(3) ஆனந்தியின் மரணத்தை அவனுக்குச் சொன்னதும் வந்தனாதான். குடும்பப் பிரச்சனை காரணமாயிருந்திருக்கலாமென அபிப்ராயப்படாள். அவளிடம் ஒரு மாதம்முன்பே வேறொரு நண்பர் சொல்லியிருக்கிறார் ஆனந்தி சரியான மனநிலையில் இல்லையென. வந்தனாவும் தொலைபேசியில் பேசியிருக்கிறாள். அவள் நன்றாகத்தான் இருப்பதாகச் சொல்ல, இவளும் விட்டுவிட்டாள். 'நான் நேர்ல பாத்து பேசியிருக்கணும், தப்பு பண்ணிட்டேண்டா' என அதீதனிடம் புலம்பினாள் வந்தனா.

(4) எப்படித் தற்கொலை செய்துகொண்டாள் என்ற விவரங்கள் வந்தனா தெரிவிக்கவில்லை. அதீதனும் கேட்டுக் கொள்ளவில்லை.

(5) அவர்கள் பிரிந்ததற்குச் சாதிரீதியான காரணங்கள் இருந்தன. ஆனால் இது அரசியல் - நீக்கம் செய்யப்பட்ட பொலிடிக்கலி கரெக்ட் கதையென்பதால் அவ்விவரங்கள் தவிர்க்கப்படுகின்றன.

(6) அன்றிரவு போதையில் வெகுநேரம் அழுதுகொண்டிருந்தான் அதீதன். அவன் சொல்லியது / உளறியது :

‘தங்கமான பொண்ணுடா, புது சுடிதார் வாங்கியிருந்தா ரெண்டு கையிலும் இப்படிப் பிடிச்சுகிட்டு எப்படியிருக்குன்னு கேப்பா... அப்படியே கண்ணுல நிக்குதுடா, ராமக்ரிஷ்ணா லன்ச் ஹோம்ல பேசிகிட்டே இருப்போம்டா, மனசுல இருக்கற கஷ்டம்லாம் மறஞ்சுடும் அவளப் பாத்தாலே, கோவமா ஒரு வார்த்தைகூடப் பேசினதில்லடா, தேவதைடா.... .... '

அதற்குமேல் கோர்வையாயில்லாமலிருந்தது.

முற்றியது.

சி மணியின் பச்சையம் (அ) உடையாத பருப்புகள்

1

1. சொல்கிறார்கள்
எழுத்திலே கூடாதாம் ;
பாலுணர்ச்சி கூடினால்
பச்சையாம்

2. வாலை இளநீரை வாய்விழியால்
வாரிப் பருகும் இவர்கள்
இளமை கொடுக்கும் துணிவில்
இடித்துக் களிக்கும் இவர்கள்
வயது வழங்கிய வாய்ப்பில்
அமர்ந்து சிலிர்க்கும் இவர்கள்
இருவரைக் கட்டிலேற்ற ஊதி
முழக்கியூர் கூட்டும் இவர்கள்
இருளில் ரகசியமாய் வெட்கி
மருவி மயங்கும் இவர்கள்
பிறகு தவழவிட்டு ஊரெல்லாம்
பெருமை உரைக்கும் இவர்கள்
எல்லாம் இவர்கள்தான் - வேறு யார்
சொல்வார்கள்? கூடாதாம்; பச்சையாம்

குறிப்பு :

காமக் கவிதை எழுத ஆசைப்பட்டேன். ஆனால் சி மணி, பிரமிள் எழுதாத என்ன எழவை நான் எழுதிவிட்டேன் என்ற கேள்வி வருமோ என பயம். அதனால் பேசாமல் சி மணியின் கவிதையையே பதிவிடத் துவங்கினேன்.

பருப்பு :

யார் யார் எதை எதை உடைத்துப் பருப்பைக் காட்டுகிறார்கள் எனப் பார்ப்பது என் வேலையில்லை. அதிகாரத்தைத் தலைகீழாகப் புரட்டிப் போடும் நெம்புகோல் வேலையை என் கதைகளோ அல்லது கவிதைகளோ செய்வதில்லை.

அங்கலாய்ப்பு :

ஏன்யா எல்லாத்தையும் ஜி நாகராஜன் சொல்லிட்டான், சாரு சொல்லிட்டான், பிரமிள் சொல்லிட்டான் அப்படின்னா, நாங்க என்னதான்யா எழுதறது?? இந்த 38 வயதிற்குமேல் நான் யாரிடம் போய் எழுதக் கற்றுக் கொள்வது? முதியோர் இலக்கியக் கல்வித் திட்டம் ஏதேனும் இருக்கிறதா?!!

ஐயகோ, தட்டச்சும் வேலைதானா எனக்கு???

தெறிப்பு & முடிப்பு :

இப்போது மறுபடியும் சி மணியின் கவிதையிலிருந்து வேறொரு பகுதி :

3. 4. டிரைவர்கள் முன்னோடும்;
விழியோரம் பெண்ணாட
விழியோடும் பெண்ணோடு;
கரம்பூம்பூம் என்றாட்டும்.

வளைக்கரம் பிடித்து
கனல்விரம் எறுக்கி
உலறிதழ் நனைத்து
அவள்துடிப் பளப்பு.

தலைப்பு சரியவும்
முலைப்பு தெரியவும்
நாக்கிலே பாடம்
நோக்கிலே கூடல்.

பக்திக்கு முகம்காட்டி
சக்திக்கு மனம்நீட்டி
முக்திக்கு வழிகேட்டு
இச்சைக்கு வழிபாடு.

5. கவர்ச்சிக் கலப்பு
கடலில் உப்பு.

(இக்கவிதைப் பகுதிகள் சி மணியின் வரும் போகும் தொகுதியிலிருந்து எடுக்கப்பட்டது. வெளியீடு : க்ரியா, வருடம் 1974).

காமக் கதைகள் 45 (20 - 4)

இந்தக் கதையில் ஒரே கள்ள உறவாக இருக்கிறது; தொலைக்காட்சி தொடர்போல் இருக்கிறது; ஒழுங்கீனத்தின் எல்லையைத் தொடுகிறது எனப் பல விமர்சனங்கள். இதற்கு விளக்கமாக பதில் சொல்வதைவிட ஒரு பத்திரிகைச் செய்தியைத் தருகிறேன் :

20.8.2008 தேதியிட்ட குமுதம் பத்திரிகையில் வந்த செய்தியின் சாரம் :

பெரும்பாலான கொலைகளுக்குப் பின்னணி செக்ஸ் பிரச்சனைகள்தான் (இங்கே செக்ஸும் வயலன்ஸும் இணையும் புள்ளியைப் பற்றி எழுதும் ஆர்வத்தை அடக்கிக் கொள்கிறேன்).

சேலம் அருகில் நடந்தது : கவுரி என்ற ஒரு அம்மா கழுத்தறுக்கப்பட்டு கொலை செய்யப்பட்டிருக்கிறார். பேரன் பேத்தி எடுத்த வயதில் ஏகப்பட்ட இளவயசுப் பையன்களுடன் சகவாசம் வைத்திருந்ததால் அவரது கணவன் புஷ்பாங்கதன் குடும்ப கௌரவம் காக்க கொன்றிருக்கிறார்.

வேளச்சேரியில் நடந்தது : ‘ஒருமுறை நீங்கள் கொடுத்த முத்தத்தை என்னால் மறக்க முடியவில்லை' என பக்கத்துவீட்டு இளைஞனுக்கு இரண்டு குழந்தைகளுக்குத் தாயான மனைவியொருத்தி கடிதம் எழுதியிருக்கிறாள். இதை அறிந்த கணவன் அவளுடன் சண்டை போட்டிருக்கிறான். அந்த இளைஞன் சமாதானப்படுத்த வந்திருக்கிறான். ஆத்திரத்தில் கணவன் அவனைக் கொன்றுவிட்டான்.

நீலகிரி மாவட்டத்தில் நடந்தது : காதலித்துத் திருமணம் செய்துகொண்ட கணவன் மனைவிக்கிடையில் ஆறு வருடம் கழித்து பிரச்சனை. மனைவிக்கு அப்பகுதியைச் சேர்ந்த வேறொரு வாலிபனுடன் கள்ளத் தொடர்பு இருந்திருக்கிறது. கணவன் கண்டிக்க, அவள் காதலனுடன் வாழச் சென்றுவிட்டாள். பிறகு அவனுடனும் ஒத்துவராமல் மறுபடியும் கணவனிடம் மன்னிப்பு கேட்டு வாழ வந்திருக்கிறாள். கொஞ்ச காலத்தில் மறுபடியும் தவறான சூழிநிலையில் மனைவியைப் பார்த்திருக்கிறான் கணவன். இதை ஒருநாள் கணவன் சொல்லிக்காட்ட ஆத்திரத்தில் இரும்புக் கம்பியால் அவன் தலையில் அடித்துக் கொன்றிருக்கிறாள் மனைவி.

இதற்குத் தீர்வை தமிழ்நாடு மனநலத் திட்ட ஒருங்கிணைப்பாளர் டாக்டர் சி. ராமசுப்ரமணியத்திடம் கேட்டிருக்கிறார்கள். அவர் கூட்டுக் குடும்பம் சிதைவைதை ஒரு முக்கியக் காரணமாகச் சொல்லியிருக்கிறார். வயதானவர்கள் காவல் தெய்வங்கள்; அவர்கள் இல்லத்தில் இருந்தால் இதுபோன்ற தீய எண்ணங்களும் தீய செயல்களும் நடக்காது என்பது அவரது கருத்து.

ஆஹா, எப்படியெல்லாம் பிரச்சனைகளை எளிமையாக்குகிறார்கள் என வியந்தான் அதீதன்.

'தொலைக்காட்சி சீரியல் மாதிரி இருப்பதாகச் சொல்வார்கள், அதனால் எழுதவேண்டாமென்று சொன்னேன்; மீறி நீ இக்கதையை எழுதிவிட்டாய். இனி நான் உனக்குக் கதை சொல்ல மாட்டேன்' எனத் தீர்மானமாய்ச் சொன்னான் அதீதன்.

அவன் சொன்ன காரணம் பற்றிய சந்தேகங்கள் எனக்கிருக்கிறது. ஆனால் என்னால் ஒன்றும் செய்ய இயலாது. ஒருவேளை அவன் மனம்மாறி மீதிக் கதைகளைச் சொன்னால், எழுதுகிறேன்.

காமக் கதைகள் 45 (20 - 3)

மாலதிக்கும் தரணிக்கும் சிறுசண்டை வந்தபோது தரணி, 'நீ உன்புருஷன விட்டு என்கூட வந்தே.. வேற ஒருத்தன் கிடைச்சா என்னவிட்டு ஓடிப்போயிட மாட்டியா என்ன' எனக் கேட்டிருக்கிறார் - அதீதனிடம் மாலதி தொலைபேசியில் சொன்னது.

மாலதிக்கு தரணியின் மூலம் ஒரு ஆண் குழந்தை இருக்கிறது. முதல் குழந்தை நார்மல் டெலிவெரி என்றாலும் இது சிசேரியன் ஆப்ரேஷன் - இதுவும் அது.

மாலதிக்கு ரத்த அழுத்தம், சர்க்கரை போன்ற வியாதிகள் வந்துவிட்டன. காரணம் தரணிதான். மாலதிமேல் சந்தேகப்படுகிறார் தரணி - இதுவமது.

மாலதியின் சிறுவயது சினேகிதன் சீனிவாசனுடன் ஒருநாள் வீட்டில் அவள் தனியாக இருந்தபோது வெளிக்கதவைப் பூட்டிவிட்டு காவல்துறைக்கு பிராத்தல் நடப்பதாகத் தகவல் தந்துவிட்டார் தரணி - இது வேறு.

போலீஸ், நண்பர்கள் தலையீடு, தகராறு, சமரசம், பிரிவு - இதுவும் வேறு.

தரணி மும்பையில் வேலைகிடைத்து மாலதியையும் குழந்தைகளையும் பிரிந்து சென்றுவிட்டார் - அதீதனின் நண்பன் சொன்னது.

பிருந்தா அவளது இரண்டாவது கணவரின் இரண்டாவது மனைவியாக வாழ்ந்து கொண்டிருக்கிறாள் அவளது ஒரே குழந்தையுடன் - அதுவும் இது.

மாலதியைப் பற்றிய தகவல்கள் இல்லை - அதுவுமிது.

வந்தனாவுக்கு அதீதனுடனான தொடர்பு தெரிந்ததும் பிரதீப் அவளை விரட்டிவிட்டான். அவள் அதீதனையும் நிராகரித்து உடன் பணிபுரிந்த சந்தோஷுடன் வாழ்ந்து கொண்டிருக்கிறாள்; நடுவில் சிலகாலம் அவள் மனது மறுபடியும் அதீதன்மேல் அலைபாய்ந்தாலும் அடக்கிக் கொண்டாள் - தனிப்பட்ட தகவலிது.

அதீதன் வீட்டிற்கு மொட்டைக் கடிதம் வந்தது, அதீதன் சந்தோஷுடன் பயந்து கொண்டே சண்டைக்குப் போனது, வந்தனா இடையில் கொஞ்ச காலம் சந்தோஷுக்குத் தெரியாமல் அவன் நண்பனான தவில் கலைஞன் பிரேமுடன் உறவு வைத்திருந்தது - இதுவமது, அதுவுமிது, வேறுவேறு.

பிரதீப் தனிமையில் வைசாக்கில் இருக்கிறான் இப்போது. அவனது பணமெல்லாம் தொலைந்து காரோட்டியாகப் பணிபுரிகிறான் - இது அதீதன் சொன்னது. கற்பனையாகச் சொல்கிறான் என நினைக்கிறேன். காரணமிருக்கிறது...

அலைபேசியில்லாத காலமது. ஒருமுறை அதீதன் தொலைபேசியில் வந்தனாவை அழைத்தபோது பிரதீப் எடுத்துவிட்டான். இது என் வீட்டு ஃபோன் கண்டவர்கள் ஃபோன் செய்யவேண்டாமென இரைந்தான். நேரில் பார்த்தால் அதீதனை உதைப்பதற்கும் தயாராய் இருப்பதாய் அறிவித்தான்.

பிரதீப் ஒரு முரடன் என்று மாலதி சொல்லியிருக்கிறாள். அவள் தங்கையை தெருவில் போகும் ஒருவன் கிண்டலடித்தபோது காரிலிருந்து இறங்கி அவன் சட்டையைப் பிடித்து அறைந்து தெருவெல்லாம் இழுத்துச் சென்று காலில் விழுந்து மன்னிப்பு கேட்கும்வரை அடித்தானாம்.

அதீதன் பதில் பேசாமல் அப்போதிருந்துவிட்டு இப்போது வாய்ப்பு கிடைத்ததும் பிரதீப்மேலான கோபத்தை இப்படிக் கதையில் புகுத்தித் தீர்த்துக் கொள்கிறானோ என்னவோ?

(இந்தக் கதையின் கடைசிப் பகுதி கட்டுரையாக வெளியாகும்)

காமக் கதைகள் 45 (20 - 2)

வந்தனா வசித்தது கோயமத்தூரில். அவள் கணவன் மேத்யூ. இரண்டு குழந்தைகள் உண்டு. சிறுவயதிலேயே காதலித்துத் திருமணம் செய்தவள். அதனால் அவளது மொத்த குடும்பமே அவளுக்கு எதிராக இருந்தது. மேத்யூவுடனான வாழ்க்கை அவளுக்குச் சலித்துவிட்டது.

அவள் வேலை செய்துவந்த ஹோட்டலில் அப்போது தரணியும் பணிபுரிந்து கொண்டிருந்தார்.

மேத்யூவிற்கு மேரியுடன் பழக்கமேற்பட்டது. அவளை இரண்டாவதாகத் திருமணம் செய்து கொண்டான் வந்தனாவின் சம்மதத்துடன். மேரி அவர்களுடனேயே வசிக்கவும் அவள் சம்மதித்தாள்.

வீட்டைவிட்டு ஓடிப்போவதென வந்தனா முடிவு செய்யும்போது அவளுக்கு வயது 27. குழந்தைகளைப் பிரிவதில் அவளுக்கு வருத்தமிருந்தாலும், இப்போது மேரியிருப்பதால் குழந்தைகளை பார்த்துக் கொள்வாள் என்று மனதைத் தேற்றிக் கொண்டாள்.

அவளை மாலதியின் வீட்டில் தங்க ஏற்பாடு செய்தார் தரணி. மாலதியின் தூரத்து உறவுப் பெண் வந்தனா என மாலதி அவள் கணவன் பிரதீப்பிடம் அறிமுகப்படுத்தினாள். அவனும் மாலதியின் சொந்தம்தான், ஆனால் இது வேறுவழி உறவு எனச் சமாளித்தாள்.

தரணிக்கு வந்தனாவுடனிருந்த உறவைப் பற்றி அவர் மாலதியிடம் மறைத்துவிட்டார். போலவே வந்தனாவும் தங்களது உறவு தூய்மையான நட்புதான் எனச் சொல்லிக் கொண்டிருந்தாள்.

- இவ்வளவு மோசமான குணங்களைக் கொண்ட தரணியை ஏன் இன்னும் அவர் இவர் என மரியாதையாக எழுதிக் கொண்டிருக்கிறீர்கள் எனக் கேட்டாள் வாசகி. அவர் அதீதனின் மேலதிகாரியாகப் பணியாற்றியவர் என்றேன். ஏற்கனவே இக்கதைகள் அதிகாரப் படிநிலைகளைக் கேள்விக்குள்ளாக்கவில்லை என விமர்சனம் இருக்கையில் நீங்கள் இப்படிச் செய்யலாமா என அக்கறையுடன் விசாரித்தாள். -

பிரதீப்பிற்கும் வந்தனாவும் நெருங்குகிறார்கள் என்பது தெரிந்தும் மாலதி கண்டுகொள்ளவில்லை, மறைமுகமாக ஊக்குவிக்கவே செய்தாள். அவர்கள் உறவு வளர்ந்ததும், அதையே காரணம் சொல்லி, பிரதீப்பிடமிருந்து விலகினாள். பிரதீப்பிற்கும் வந்தனாவுடன் வாழ ஆசையிருந்ததால் இதைப் பெரிய பிரச்சனையாக்கவில்லை.

குழந்தையையும் கூட்டிக் கொண்டு தரணியுடன் வாழத் துவங்கினாள் மாலதி. தரணி வேறுவேலை கிடைத்து ஈரோட்டிற்குச் சென்றுவிட்டார் அவர்களுடன்.

அதீதனுக்கு மாலதிமூலம் வந்தனா பழக்கமானாள். இரண்டே வாரங்களில் காதலிக்கத் துவங்கினார்கள். இதற்கிடையில் வந்தனா பிரதீப்புடனும் நெருக்கமாக இருந்திருக்கிறாள், அவளால் இருவரில் ஒருவரை முடிவு செய்ய இயலவில்லை.

இக்கதையின் தொடர்ச்சி காமக் கதைகள் 45 (10) என்ற தலைப்பில் எழுதப் பட்டிருக்கிறது. மீண்டுமொருமுறை அக்கதையைப் படிக்கும்படி கேட்டுக் கொள்கிறேன். (http://jyovramsundar.blogspot.com/2008/07/45-10.html)

(இந்தக் கதை இன்னமும் முடியவில்லை... )

காமக் கதைகள் 45 (21)

எனக்குக் காலக் குழப்பம் உண்டு. அதீதன் சொல்லிய சில கதைகள் முன்பின்னாக மாறியிருக்க வாய்ப்புண்டு.

போலவே அதீதனுக்கும். அதீதன் மாலை தூங்கி எழுந்தால், காலையோ எனக் குழம்பி பல்துலக்க ஆரம்பித்துவிடுவான். அவனது இக்குணம் எனக்குத் தெரியும். அதனால் முடிந்தவரை வரிசைக்கிரமாகக் கதைகளைச் சொல்லிக்கொண்டு வருகிறேன். அதையும் மீறிச் சில கதைகள் முன்பின்னாகவோ அல்லது வேறுமாதிரியோ மாறியிருக்கச் சாத்தியமிருக்கிறது. நீங்களும் இதே வரிசையில்தான் படிக்கவேண்டுமென்ற கட்டாயமில்லை. உதாரணத்திற்கு நீங்கள் முதலில் இந்தக் கதையைக்கூடப் படிக்கத் துவங்கலாம், அல்லது 36வது கதையையும் முதலில் படிக்கலாம்.

ஏற்கனவே நடந்த மற்றும் சொல்லப்பட்ட கதைகளையே மறுபடியும் எழுதிக் கொண்டிருக்கிறேன் என்பதை நினைவில் வையுங்கள் வாசகிகளே.

அதீதன் தன்னுடைய காதலி வித்யாவை அட்டகாசமாக அறிமுகப்படுத்தினான் எனக்கு. அழகாகவே இருந்தாள். அடிக்கொருதரம் அவனைக் காதலுடனும் பெருமையுடனும் பார்த்துக் கொண்டிருந்தாள்.

'உங்களுக்கு அதீதன எவ்வளவு நாளாத் தெரியும்?'

‘என்னடா இண்டர்வ்யூ மாதிரி கேக்கறே... நாலஞ்சு மாசமாத் தெரியும்' என்றான் அதீதன். அவனை முறைத்தேன். அதீதனைத் தனியே இழுத்துச் சென்று ‘உன் காதலியை நானென்ன அபகரித்துவிடவா போகிறேன், அவளைப் பேசவிடு' என்றேன்.

‘நீ நினைத்தாலும் உன்னால் அது முடியாது. நம்ம ஆளு வேற யாரையாவது பாத்துடுமா என்ன?' எனத் திமிர் பொங்கச் சொன்னான் அதீதன். எனக்குச் சீண்டிப் பார்க்கும் ஆசை வந்தது. ‘சரி பார்க்கலாம்' எனத் திரும்பினோம்.

அதீதனைப் பற்றிப் பல விஷயங்கள் அவளுக்குத் தெரிந்திருந்தது - முக்கியமாக அவன் பல பெண்களுடன் வைத்திருக்கும் தொடர்பு பற்றி. அதுகுறித்து அவள் கவலைப்படவில்லை. என்னுடன் எப்படிப் பழகுகிறான் என்பதுதான் எனக்கு முக்கியமென்றாள். இது எனக்கு ஆச்சரியமாகவே இருந்தது.

கறுப்பு நாய் விஸ்கியைத் திறந்து மூவரும் அருந்தத் துவங்கினோம். மூவரும் இளக ஆரம்பித்தோம்.

மெதுவாக வித்யாவிடம் ஆரம்பித்தேன்.. அவளைப் பற்றிய விவரங்களைக் கேட்டபிறகு, அவளுக்கு வேறு யாருடனாவது தொடர்பிருக்கிறதா எனக் கேட்டேன். அவள் ஓ இருக்கிறதே என ஒப்புக் கொண்டாள்...

அதீதன் தவிக்க ஆரம்பித்துவிட்டான். அடுத்த பெக்கை ஒரே வாயில் விழுங்கினான். அவனது மாற்றத்திற்கான காரணம் புரியாமல் அவனையே பார்த்துக் கொண்டிருந்தாள். அறையில் கூடிக்கொண்டிருந்த அழுத்தம் கொஞ்சம் பயத்தைகூடத் தந்தது.

வித்யாவும் அதீதனும் மறுபடி சந்தித்துக் கொள்ளவேயில்லை.

காமக் கதைகள் 45 (20 - 1)

மாலதியும் பிரதீப்பும் காதலித்து திருமணம் செய்தவர்கள்; தூரத்து உறவினர்களும்கூட. அவர்களுக்கு இரண்டாம் வகுப்பில் படிக்கும் பெண்குழந்தை உண்டு. இருவருக்கும் மணவாழ்க்கையில் சிறுசிறு உரசல்கள்.

மாலதியின் சிறுவயது சிநேகிதி பிருந்தா. பிருந்தாவின் கணவன் தரணி. இவர்களும் காதல் திருமணமே.

பிருந்தாவின் மூலம் தரணியின் பழக்கமேற்பட்டது மாலதிக்கு.

பிரதீப் மாலையில் நண்பர்களுடன் வீட்டில் அமர்ந்து மது அருந்துவான். மாங்காய் அரிந்து உப்பு மிளகாய்ப் பொடி தூவிக் கொடுப்பது, முந்திரிப் பருப்பு நெய்யில் வறுத்துக் கொடுப்பது மாலதி செய்ய வேண்டும். குடித்து முடித்தபின், அவர்களுக்கு தோசை அல்லது சப்பாத்தி சுட்டுத் தர வேண்டும். இதுகுறித்து இருவருக்கும் சண்டை வெடித்தது ஒரு நாள். மாலதியைக் கடுமையாகத் தாக்கியிருக்கிறான் பிரதீப். இருவரும் ஒரே வீட்டில் வாழ்ந்தாலும் தனித்தனியே வாழத்துவங்கினர்.

மாலதிக்குப் தரணியின்மேல் ஈர்ப்பேற்படத் துவங்கியது.

அதீதன் வேலைசெய்து கொண்டிருந்த நிறுவன மேலாளர்களில் ஒருவர் தரணி. அவரைப் பார்க்கவரும்போது அல்லது தொலைபேசி அழைப்பை ஃபார்வார்ட் செய்யும்போதென மாலதியின் நட்பு கிடைத்தது அதீதனுக்கு. இருவரும் மணிக்கணக்கில் தொலைபேசியில் பேசிக் கொண்டிருப்பார்கள். அவள் தரணிமேல் இருக்கும் காதலைச் சொன்னாள் அதீதனிடம். தரணியும் மாலதியும் நெருங்கினார்கள்.

'பிரதீப் மோசமான குடிகாரன், அவன்கிட்ட நான் பட்ட கஷ்டங்கள் கொஞ்சநஞ்சமில்ல' என்றாள் அதீதனிடம் மாலதி. திருமண வாழ்க்கையில் தான் அவனிடம் அடைந்த துன்பங்களைப் பட்டியலிடுவாள். அவனுக்கென்னவோ அவள் அதிகப்படுத்திச் சொல்வதாகப்படும். பேசாமல் கேட்டுக் கொள்வான். தரணியும் பெருங்குடிகாரனென்பது மாலதிக்குத் தெரியாமலிருக்காது!

- அலுவலகத்தில் வேலை செய்துகொண்டிருந்த தீப்தியை தரணி கணக்கு பண்ணிக் கொண்டிருந்தார். (தீப்தி நடிகை ராதா மாதிரி தளதளன்னு இருப்பாடா என்றான் அதீதன்). நடுவில் அதீதன் புகுந்து தீப்தியிடம் சிறுசிறு குறும்புகள் செய்து கொண்டிருந்தான். யாரோ இதை தரணியிடம் போட்டுக் கொடுத்துவிட்டனர்.

சவேரா ஹோட்டல் குளத்தினருகில் நடந்த பார்ட்டி ஒன்றில் தரணி 'i will kill you bastard' எனக் கத்தியபடி, அதீதனை உதைக்க காலைத் தூக்கிக் கொண்டு ஓடிவந்தார். சுற்றியிருந்தவர்களுக்கு ஒன்றும் புரியவில்லை. அதீதன் பயத்தில் உறைந்து போனான் -

மாலதியின் துரோகத்தை அறிந்ததும் பிருந்தாவிற்கு ஆவேசமேற்பட்டது. தரணியைப் பிரிந்து அவள் பணிபுரிந்து கொண்டிருந்த நிறுவன இயக்குனருடன் இரண்டாவது மனைவியாக வாழ தன் குழந்தையுடன் ஹைதராபாத் சென்றுவிட்டாள்.

அவள் செயலின் நியாயம் அதீதனுக்குப் புரிந்தேயிருந்தது.

அங்கிருந்து அதீதனுடன் அவ்வப்போது தொலைபேசியில் பேசுவாள். பிருந்தாவிற்கு அதீதனும் மாலதியும் நண்பர்களெனத் தெரியாது.

‘நீ என் தம்பி மாதிரி அதீதா. என்னால தரணியக்கூட மன்னிச்சுட முடியும். ஆனா மாலதிய மன்னிக்கவே முடியாது...' சகட்டுமேனிக்கு மாலதியைத் திட்டுவாள்.

‘தீப்தி விஷயமும் எனக்குத் தெரியும் அதீதா. எவ்வளவு நாளைக்குத்தான் இப்படிப்பட்ட ஆளுகூட வாழறது. அதுதான் முடியாதுன்னு கிளம்பிட்டேன்...'

'தரணி அந்த ஓடுகாலிகூடவே குடும்பம் நடத்தட்டும். அவ அந்தாளுக்கு டாடா காட்டிட்டுப் போவா பாரு, அப்பத்தான் என் ஆத்திரம் அடங்கும்...'

மாலதிக்கு அதீதன் பிருந்தாவுடன் தொடர்பில் இருக்கிறான் என்பது தெரியும். அவனிடம் ‘அவ என்னைப்பத்தி ஊரெல்லாம் என்ன சொல்றான்னு தெரியும். அவ கதை எனக்குத் தெரியாதா' என்பாள். அவன் மய்யமாக ம்ம் என்பான்.

அதீதன் மாலதியுடனும் பிருந்தாவுடன் பேசுவது தரணிக்குத் தெரியாது. சிலசமயம் இருவரைப் பற்றியும் அவனிடம் பேசிக் கொண்டிருப்பார். பிருந்தா வீட்டில் நடக்கும் விஷயங்களை - இரவில் நடப்பது உட்பட - மாலதியிடம் சொல்லிவிடுவாளாம். 'நீங்க என்னைக் காதலிக்கும்போது எப்படி அவளோட படுக்கலாம்னு மாலதி சண்டை போடுவா அதீதா'.

'இப்படி ஒருவருக்குத் தெரியாமல் இன்னொருவரிடம் நட்பு வைத்துக் கொள்வது ரொம்பச் சங்கடமானது... ஞாபக சக்தியைச் சோதிக்கக் கூடியது' என்றான் அதீதன் என்னிடம்.

சொல்ல விட்டுப்போனது : தரணியும் பிருந்தாவும் மலையாளிகள். பிருந்தா பேசும் தமிழ் மலையாளத்தைப் போலவே இருக்கும். நடுநடுவில் மலையாள மற்றும் ஆங்கிலக் கலப்போடு அவள் பேசும் தமிழ் அழகானது. அதீதனுக்கு அவள்மீது ஒரு இனந்தெரியாத கவர்ச்சியிருந்தது.

(இந்தக் கதை முடியவில்லை, இன்னுமிருக்கிறது....)

காமக் கதைகள் 45 (19)

காமம் ம்மகா மகாம் ம்காம காம்ம

படுக்கை முன் விளையாட்டு பெண் பாலியல் செக்ஸ் மனமைதுனம் ஆணுறை மாத்திரை சுயமைதுனம் நிலை வழி உறவு ஜெல் கற்பனை எழுச்சி தூண்டல் குறி யோனி விந்து முலை தொடை பிருஷ்டம் காதுமடல் நெற்றி புணர்ச்சி ஆர்கசம் தகும் உறவு நேர் கற்பனை பேராண்மை போதை ஹோமோ ஹெட்ரோ வயாக்ரா ஊசி களிம்பு மயிர் புனைவு கருப்பை காதல் சேர்தல் உதடு மச்சம் மேலே கீழே பக்கவாட்டில் முன்பின் பின்முன் சிறியகுறி பெரியமுலை அகண்டதொடை கவர்ச்சி உணர்வு வேட்கை வெங்காயம் முருங்கைக்காய் குழப்பம் காமசூத்ரா நின்ற நிலை நாய் விரைப்பு கழுதை தாகம் பயம் வீக்கம் வெறி பிறன்மனை நோக்குதல் கற்பு கலவி வெறி கல்வி இடுப்பு மடிப்பு அகன்ற தோள்கள் சிக்ஸ் பேக்ஸ் விரிந்த மார்பு குவிந்த உதடு முயல் பாம்பு எய்ட்ஸ் சல்லாபம் விகாரம் ஆண் மையல் சுருங்கிப் போதல் குதிரை மனைவி சம்போகம் மோகம் எழுச்சி

காம்ம ம்காம மகாம் ம்மகா காமம்

காமக் கதைகள் 45 (18)

அதீதன் வசிக்கும் அடுக்குமாடிக் குடியிருப்பிற்குப் புதிதாக குடிவந்திருந்த மாலதியை பார்த்தான். அவளது வடிவான தோற்றம் அவனைக் கவர்ந்தது.

இப்போது நீங்கள் ஒரு பெண்ணைப் பார்ப்பதாகக் கற்பனை செய்து கொள்ளுங்கள்.

அவளைப் பற்றிய விவரங்களைச் சேகரித்தான். அவளுடன் பழக விரும்பினான்.

நீங்கள் இப்போது பழக விரும்புகிறீர்கள்.

அவன் வீட்டிலிருந்து புத்தகங்கள் மற்றும் பத்திரிகைகளை படிக்க எடுத்துச் செல்ல அவள் வந்தபோது பழகுவதற்கு வாய்ப்பு கிடைத்தது. மிகக் கண்ணியமாகப் பழகினான். அவனுடைய சுவாரசியாமான பேச்சும் உடல்மொழியும் மாலதிக்குப் பிடித்தன.

மோதலில் ஆரம்பிக்கும் சில சினிமா படங்கள் உங்களுக்கு இப்போது ஞாபகம் வராமல் இருக்கட்டும்.

முதலில் புத்தகங்களைப் பற்றிப் பிரதானமாகவும், பிறகு சிறிது நேரம் தனிப்பட்ட விவரங்களையும் பேசினர். அவனுக்குத் தெரிந்த பல எழுத்தாளர்களின் புத்தகங்களை அவளுக்கு அறிமுகம் செய்கிறான். அவள் அப்புத்தகங்களை வாசித்துவிட்டு அவனுடன் விவாதிக்கிறாள்.

உங்களுக்கு இப்போது உங்களுடைய காதலி நினைவிற்கு வருகிறாள். நீங்கள் அவளுடன் பழகிய ஆரம்ப நாட்களை அசைபோடுகிறீர்கள்.

சிறிது நாட்களில் தனிப்பட்ட விஷயங்கள் முக்கியமாகவும், புத்தகங்களைப் பற்றிய பேச்சு குறைகிறது.

நீங்கள் இப்போது நெருங்கத் துவங்குகிறீர்கள். இதற்கு அடுத்துவரும் வரிகளைப் பற்றிக் கவலைப்படாமல் உங்கள் கற்பனையின் மூலம் மீதிக் கதையை எழுதுகிறீர்கள்.

உங்களுடைய அந்தக் கதையில் அதீதனும் மாலதியும் காதலிக்கத் துவங்குகிறார்கள். வழக்கமாகக் காதலர்கள் போகும் இடங்களான கடற்கரைக்கும் சினிமாக்களுக்கும் பூங்காக்களுக்கும் போகிறார்கள். பப்களுக்கும் டிஸ்கொத்தேக்களுக்கும் செல்வது உங்களுக்குப் பிடிக்காததாகையால் அவர்கள் அவ்விடங்களுக்குச் செல்வதில்லை. பெற்றோரை எதிர்த்து திருமணம் செய்துகொண்டு முதலிரவை அனுபவிக்கிறார்கள். இப்போது நீங்கள் பார்த்த நீலப் படக் காட்சிகளையும் மனதிற்குள் கொண்டுவந்து அவர்களுடன் பொருத்திப் பார்க்கிறீர்கள். இத்துடன் உங்கள் கற்பனை முடிவிற்கு வருகிறது.

உங்கள் கற்பனையை என்னுடைய கதையுடன் சரிபார்த்துக் கொள்ள விழைகிறீர்கள். அதற்காக இக்கதையின் முதல் வரிகளிலிருந்து மீண்டும் வாசிக்கத் துவங்குகிறீர்கள்.

காமக் கதைகள் 45 (17)

மக்களே உண்மை உரைப்பேன், கேளுங்கள்.

1. நம்முடைய பண்பாடு கலாச்சாரம் மேன்மையானது. அவை நம்மிரு கண்களைப் போன்றது. அதைக் கட்டிக் காப்போம்.

2. பிரம்மச்சரியமே உயர்ந்தது. சன்னியாச வாழ்க்கையே ஆண்டவனுக்கு நெருக்கமானது.

3. அது முடியாவிடில், திருமணம் செய்துகொள்வீர். பெற்றோரின் மனம்கோணாமல் அவர்கள் நிச்சயிக்கும் வரனையே மணமுடிப்பீர்களாக.

4. கணவன் மனைவி இருவரும் வஞ்சித்துக் கொள்ளாமல் ஒருவருக்கொருவர் உண்மையாகவும் விசுவாசமாகவும் இருங்கள். உங்கள் இருவருக்குள் சிறு சந்தேகமும் வராமல் நடந்துகொள்வீர்.

5. முறையற்ற உறவைத் தவிர்ப்பீர். உங்களுக்குச் சொர்க்கம் சாசுவதமாகும்.

5.அ. மனைவியின் உடல் அவளுக்குச் சொந்தமானதல்ல. கணவனின் அதிகாரதிற்குட்பட்டதே அது.

5.ஆ. கணவன் வேறுமகளிருடன் உறவுவைத்திருந்து, அது தெரியவந்தாலும், மனைவி பொறுத்துக் கொண்டு அவனுடன் வாழ்ந்து பணிவிடை செய்தால் அவளுக்குச் சுமங்கலி யோகம் நிச்சயமுண்டாகும்.

6. குடும்பம் / திருமண உறவுகள் புனிதமானவை. அதைக் காப்பேன் என உறுதிமொழி எடுத்துக் கொள்வீர்களாக.

7. கணவன் மனைவி இருவரும் நோன்புகள் பல இருந்து தங்கள் உடல் இச்சைகளைக் குறைத்துக் கொள்ளட்டும். ஆட்டம் பாட்டம் போன்ற கேளிக்கைகளை தவிர்ப்பீர்.

8. திருமணமாகும்வரை பொறுத்திருப்பீர். குறைந்தபட்சம் திருமணமாகும்வரை ஆண் பெண் இருவரும் தொடாமலிருப்பதே நல்லது.

9. விதவைகள் உண்ணா நோன்பு போன்ற கடுமையான விரதங்கள் இருந்து தங்கள் இச்சைகளை அடக்கிக் கொள்வார்களாக. அவர்கள் உணவில் வெங்காயம், பூண்டு, முருங்கை, மாமிசம் போன்றவற்றைத் தவிர்ப்பார்களாக.

இவ்வளவையும் கேட்டதும் அதீதன் தன் இடக்கை நடுவிரலை உயர்த்திக் காட்டினான்.

இனி, கேள்வி பதில் பகுதி :

1. காமக் கவிதைக்கும் காமக் கதைக்குமான வித்தியாசத்தை கூறுக
2. வர்ஷாவுடனான அதீதனின் உறவு ஏன் முறிந்தது
3. அதீதன் கதாபாத்திரம் குறித்து சிறுகுறிப்பு வரைக
4. பள்ளிகளில் செக்ஸ் கல்வி தரலாமா என்பது பற்றிய உங்கள் பார்வை என்ன
5. உடலுறவு கொள்ள எந்த நிலை ஏற்றது ? ஏன் ?